主懷安息

牛牛太太在喪禮中分享了三件關於牛牛的事。

<—>

熟悉牛牛嘅朋友都知道佢有寫作嘅習慣，佢個blog本來只係個人嘅日常生活記錄、旅遊日誌、日劇、韓劇和電影分享。六年前病咗之後，就加入了抗癌誌。

網誌由開頭零點擊，到現在有好多來自世界各地嘅網友留言，有鼓勵嘅說話，有病友交流心得，亦有照顧者幫屋企人問問題。牛牛都好用心一一解答網友所有嘅問題。有一次在醫院病房，有一位護士認出他，話有睇開佢嘅blog。我哋喺網誌公佈咗牛牛逝世嘅消息之後，網友都紛紛留言多謝佢嘅無私分享，話佢堅毅嘅抗癌態度比咗好多勇氣同路人。

<二>

咁多年來，我哋都未見過牛牛喊(哭) 。上年10月手術出院後，返到屋企佢同我講佢喺醫院發現唔見咗隻結婚戒指，佢叫自己鎮定，不要慌張，一定會搵到，最後好彩真係搵得番。 但係當佢講番呢件事俾我聽嘅時候, 佢就忍唔住喊(哭) , 呢次係我第一次同最後一次見到佢喊(哭) 。

<三>

得到大腸癌呢個病，牛牛從來冇怨言，佢成日都話「有病咪醫囉！天主自會有安排，大家幫我祈禱就得啦！」。佢從來冇講過辛苦，直至離開嗰日下晝，睡醒時問我「好辛苦，點算？」我回答說「你現在係屋企 (家) ，祈禱就可以！」然後佢就合上眼睡着了，跟住就返咗天家。

牛牛嘅離開，我們難免會哀傷，但我希望大家像我一樣，學習牛牛的樂觀積極，他經常說 Think Positive，Life as Usual。 大家請為佢高興，可以回去天主的懷抱，亦在母親節同佢媽媽喺天堂團聚。感謝各位陪伴牛牛完成佢人生嘅馬拉松！主佑各位。